غم و اندوہ کا سینے میں سمندر لے کر

غم و اندوہ کا سینے میں سمندر لے کر

جئے جاتا ہوں مگر ہاتھ میں ساغر لے کر

خود فریبی کے اندھیرے میں اتر جاتا ہوں

خود کو جب ڈھونڈتا ہوں ہاتھ میں پتھر لے کر

سامنے آئے گا وہ جب بھی پکاروں اس کو

اپنے چہرے پہ مگر نور کی چادر لے کر

ایک الھڑ سی کوئی یاد بھلے وقتوں کی

دل کے پنگھٹ پہ چلی آتی ہے گاگر لے کر

وقت بھی ہم سے الجھ پڑتا ہے ہم بھی اس کو

روز للکارتے ہیں ہاتھ میں ساغر لے کر

ہم فسادوں میں بھی ہمسائے سے مل آتے ہیں

کبھی پتھر کبھی بھالا کبھی خنجر لے کر

داور حشر سے ہم ملنے چلیں گے راحتؔ

طائر فکر کا ٹوٹا ہوا اک پر لے کر

gham-o-andoh ka sine mein samundar le kar

jiye jata hun magar hath mein saghar le kar

khud farebi ke andhere mein utar jata hun

khud ko jab dhundta hun hath mein patthar le kar

samne aega wo jab bhi pukarun us ko

apne chehre pe magar nur ki chadar le kar

ek alhar si koi yad bhale waqton ki

dil ke panghat pe chali ati hai gagar le kar

waqt bhi ham se ulajh parta hai ham bhi us ko

roz lalkarte hain hath mein saghar le kar

ham fasadon mein bhi hamsae se mil ate hain

kabhi patthar kabhi bhala kabhi khanjar le kar

dawar-e-hashr se ham milne chalenge rahat

tair-e-fikr ka tuta hua ik par le kar