کون اب ان کی انجمن میں نہیں

کون اب ان کی انجمن میں نہیں

چپ ہیں جیسے زباں دہن میں نہیں

اپنے آبا میں تھی رواداری

اب وہ میرے ترے چلن میں نہیں

مال و زر کو کہاں چھپاؤ گے

جیب جب آپ کے کفن میں نہیں

دو گھڑی کا سکوں خرید سکے

ایسی طاقت تمہارے دھن میں نہیں

صبر کا پھل کہاں ملے گا تجھے

صبر کا پیڑ ہی چمن میں نہیں

بات جو حق کی برملا کہہ دے

وہ زباں ہی کسی دہن میں نہیں

جس کو بوئے وفا بھی کہتے تھے

ویسی خوشبو تو اب وطن میں نہیں

ہم ہنر کہہ سکیں جسے یارو

ہم میں ہے وہ ہمارے فن میں نہیں

اب تو اپنے تئیں بھی اے راحتؔ

کوئی رنجش ہمارے من میں نہیں

kaun ab un ki anjuman mein nahin

chup hain jaise zaban dahan mein nahin

apne aba mein thi rawadari

ab wo mere tire chalan mein nahin

mal-o-zar ko kahan chhupaoge

jeb jab ap ke kafan mein nahin

do ghari ka sakun kharid sake

aisi taqat tumhare dhun mein nahin

sabr ka phal kahan milega tujhe

sabr ka per hi chaman mein nahin

bat jo haq ki barmala kah de

wo zaban hi kisi dahan mein nahin

jis ko bu-e-wafa bhi kahte the

waisi khushbu to ab watan mein nahin

ham hunar kah saken jise yaro

ham mein hai wo hamare fan mein nahin

ab to apne tain bhi ai rahat

koi ranjish hamare man mein nahin