Arooz is now on the App Store, for iPhone and iPad. Download →

All poetry

اپنے ہونے پہ نہ ہونے کا نشاں رکھا ہے

Ozair Yusuf (b. 1989)

اپنے ہونے پہ نہ ہونے کا نشاں رکھا ہے

صاف ظاہر ہوں مگر خود کو نہاں رکھا ہے

سوچ سکتا ہوں تجھے دیکھ نہیں سکتا میں

کیا بتاؤں کہ تجھے میں نے کہاں رکھا ہے

وہ مری سمت میں آئے گا پلٹنے کے لئے

میں نے امکان سے آگے بھی گماں رکھا ہے

آنکھ کھلتی ہے کسی اور جہاں میں میری

بند آنکھوں میں کوئی اور جہاں رکھا ہے

سلسلہ وار مرے خواب میں آ کر اس نے

کس تواتر سے کہانی کو رواں رکھا ہے

اس نے رکھا ہے مجھے ساتھ تو اپنے لیکن

دل ہی رکھا ہے مرا دل میں کہاں رکھا ہے

بے خیالی نے اٹھا کر یہ مرا پاؤں عزیرؔ

جس جگہ کوئی نہیں پہنچا وہاں رکھا ہے