مکیں کے ہوتے ہوئے رابطہ مکاں سے ہوا

مکیں کے ہوتے ہوئے رابطہ مکاں سے ہوا

مکالمہ جو ہوا بھی تو بے زباں سے ہوا

میں اس کی سمت جو نکلا تو کچھ نہیں تھا وہاں

وہیں کھڑا تھا اشارہ مجھے جہاں سے ہوا

تمہارے بعد بدن میں تلاش کرتا ہوں

میں اپنے آپ میں خالی کہاں کہاں سے ہوا

میں اپنے قاعدے قانون لے کے آیا ہوں

وہ نصف نصف نہیں جو بھی درمیاں سے ہوا

تلاش کرتے پھرے ہم سفر عزیرؔ مجھے

کچھ اس طرح میں جدا گرد کارواں سے ہوا

makin ke hote hue rabta makan se hua

mukalama jo hua bhi to be zaban se hua

main us ki samt jo nikla to kuchh nahin tha wahan

wahin khara tha ishara mujhe jahan se hua

tumhare baad badan mein talash karta hun

main apne ap mein khali kahan kahan se hua

main apne qaide qanun le ke aya hun

wo nisf nisf nahin jo bhi darmiyan se hua

talash karte phire ham safar azer mujhe

kuchh is tarah main juda gard-e-karwan se hua