اندر بھی تھا خلا سو خلا دیکھتا رہا

اندر بھی تھا خلا سو خلا دیکھتا رہا

میں آسماں کی سمت کھڑا دیکھتا رہا

اک میں کہ دیکھتا رہا اس میں خدا کو اور

اک اور شخص مجھ میں خدا دیکھتا رہا

میری نشست اس سے ذرا دور تھی مگر

میں اس کے ساتھ خالی جگہ دیکھتا رہا

آنکھوں میں اس قدر تھی مرے تیرگی کہ میں

جلتے ہوئے دیے کو بجھا دیکھتا رہا

اندر پرانے زخم کی صورت بگڑ گئی

میں چہرہ آئنے میں کھڑا دیکھتا رہا

کچھ اور دیکھنے کو نہیں تھا کہ دیکھتا

سو وقت کو گزرتا ہوا دیکھتا رہا

وہ مجھ سے پوچھتا رہا کیسے ہو تم عزیرؔ

اور میں ہوا میں جلتا دیا دیکھتا رہا

andar bhi tha khala so khala dekhta raha

main asman ki samt khara dekhta raha

ik main ke dekhta raha is mein khuda ko aur

ik aur shakhs mujh mein khuda dekhta raha

meri nashist us se zara dur thi magar

main us ke sath khali jagah dekhta raha

ankhon mein is qadar thi mire tirgi ke main

jalte hue diye ko bujha dekhta raha

andar purane zakhm ki surat bigar gai

main chehra aine mein khara dekhta raha

kuchh aur dekhne ko nahin tha ke dekhta

so waqt ko guzarta hua dekhta raha

wo mujh se puchhta raha kaise ho tum azer

aur main hawa mein jalta diya dekhta raha