کھینچ کر تو لے گیا ہے جس طرف بنتا نہیں

کھینچ کر تو لے گیا ہے جس طرف بنتا نہیں

تو یقیناً بات میری ٹھیک سے سمجھا نہیں

میری چپ کی گفتگو کو سننے والے چپ رہے

اور بھی کچھ بولنا تھا اور میں بولا نہیں

عمر ساری کٹ گئی دونوں کی دروازے کے پاس

میں نے دستک دی نہیں اور اس نے در کھولا نہیں

تیرے رستے میں پڑا تھا ایک پتھر کی طرح

پھر تری ٹھوکر لگی اور میں کہیں ٹھہرا نہیں

اک جگہ پر چھوڑ کر خود کو میں آگے چل دیا

اور پھر میں واپسی پر اس جگہ پر تھا نہیں

روبرو میرے وہی ہے چار سو میرے وہی

ایک مدت سے جو میرے سامنے آیا نہیں

سانحے کی اور کیسی شکل ہوتی ہے عزیرؔ

اس نے دل پہ ہاتھ رکھا اور دل دھڑکا نہیں

khinch kar to le gaya hai jis taraf banta nahin

tu yaqinan bat meri thik se samjha nahin

meri chup ki guftugu ko sunne wale chup rahe

aur bhi kuchh bolna tha aur main bola nahin

umr sari kat gai donon ki darwaze ke pas

main ne dastak di nahin aur us ne dar khola nahin

tere raste mein para tha ek patthar ki tarah

phir tiri thokar lagi aur main kahin thahra nahin

ik jagah par chhor kar khud ko main age chal diya

aur phir main wapsi par is jagah par tha nahin

rubaru mere wahi hai char su mere wahi

ek muddat se jo mere samne aya nahin

sanehe ki aur kaisi shakl hoti hai azer

us ne dil pe hath rakha aur dil dharka nahin