Arooz is now on the App Store, for iPhone and iPad. Download →

All poetry

غلط سب دلیلیں غلط سب حوالے

Pandit Vidya Rattan Asi (1938–2019)

غلط سب دلیلیں غلط سب حوالے

اندھیرے اندھیرے اجالے اجالے

مرے حال پر پھبتیاں کسنے والے

مبادا تجھے پھونک دیں میرے نالے

ہمیں جان و دل سے وہ اپنا بنا لے

مگر ہم کہاں ایسی تقدیر والے

مجھے وعظ پر وعظ فرمانے والے

اگر کوئی تیری بھی نیندیں چرا لے

ہزاروں تھے دنیا میں اخلاص والے

مگر گردش وقت نے پیس ڈالے

رہے زندگی میں بجا سعئ پیہم

مقدر کا لکھا مگر کون ٹالے

محبت پہ تیرا یہ احسان ہوگا

محبت میں جی سے گزر جانے والے

ادھر تو ہے مہکی فضائے محبت

ادھر ذہن پر چند یادوں کے جالے

حقیقت ہمیشہ حقیقت رہے گی

حقیقت پہ پردے کوئی لاکھ ڈالے

محبت کی نیرنگیاں توبہ توبہ

کہیں راتیں روشن کہیں دن بھی کالے

کوئی دم کے مہماں ہیں اے زندگی ہم

جہاں تک تجھے راس آنا ہے آ لے

اگر میری ہستی کھٹکتی ہے تجھ کو

تو لے ڈوب جاتا ہوں اے ناخدا لے

کسی جان جاں کی امانت ہیں عاصیؔ

یہ اشکوں کے طوفاں یہ آہیں یہ نالے