دوسروں کی آنکھ لے کر بھی پشیمانی ہوئی

دوسروں کی آنکھ لے کر بھی پشیمانی ہوئی

اب بھی یہ دنیا ہمیں لگتی ہے پہچانی ہوئی

اشک کی بے رنگ کھیتی مدتوں میں لہلہائی

پہلے کتنا قحط تھا اب کچھ فراوانی ہوئی

خود کو ہم پہچان پائے یہ بہت اچھا ہوا

جسم کے ہیجان میں روحوں کی عریانی ہوئی

میں تو اک خوشبو کا جھونکا تیرے دامن کا ہی تھا

بوئے گل سے آ ملا کیوں تجھ کو حیرانی ہوئی

اس کا بازار ہوس میں قدرداں ہی کون تھا

جنس دل کی پھر یہاں کیوں اتنی ارزانی ہوئی

dusron ki ankh le kar bhi pashemani hui

ab bhi ye duniya hamen lagti hai pahchani hui

ashk ki be rang kheti muddaton mein lahlahai

pahle kitna qaht tha ab kuchh farawani hui

khud ko ham pahchan pae ye bahut achchha hua

jism ke haijan mein ruhon ki uryani hui

main to ik khushbu ka jhonka tere daman ka hi tha

bu-e-gul se a mila kyun tujh ko hairani hui

us ka bazar-e-hawas mein qadardan hi kaun tha

jins-e-dil ki phir yahan kyun itni arzani hui