ناخدا کی مشکلیں آسان کر جاتا ہوں میں

ناخدا کی مشکلیں آسان کر جاتا ہوں میں

اپنی کشتی آپ جب طوفاں سے ٹکراتا ہوں میں

ان کا ہر اک قول اکثر بے عمل پاتا ہوں میں

ناصحوں کی بات کو خاطر میں کب لاتا ہوں میں

کس قدر ہے نارسا میرا مقدر دیکھیے

عین منزل کے قریب آ کر بھٹک جاتا ہوں میں

ہر بلا ناگہاں میرا مقدر بن گئی

ہر بلا سے خود کو اب محفوظ تر پاتا ہوں میں

جب محبت جان تھی ایمان تھی وہ دن گئے

اب محبت کے تصور سے بھی گھبراتا ہوں میں

بے ترے جو کچھ گزرتی ہے مرے دل پر نہ پوچھ

زندگی کو موت کے نزدیک تر پاتا ہوں میں

میں تری باتوں میں آ کر بے سر و ساماں ہوا

اب مگر اے دل تری باتوں میں کب آتا ہوں میں

مدتیں گزریں کہ دل نے کی تھی ان کی آرزو

آج تک دشت طلب میں ٹھوکریں کھاتا ہوں میں

زندگی میں رنگ و بو نے کس قدر دھوکے دئے

اس پہ بھی آسی فریب رنگ و بو کھاتا ہوں میں

nakhuda ki mushkilen asan kar jata hun main

apni kashti ap jab tufan se takrata hun main

un ka har ik qaul aksar be amal pata hun main

nasihon ki bat ko khatir mein kab lata hun main

kis qadar hai narasa mera muqaddar dekhiye

ain manzil ke qarib a kar bhatak jata hun main

har bala nagahan mera muqaddar ban gai

har bala se khud ko ab mahfuz tar pata hun main

jab mohabbat jan thi iman thi wo din gae

ab mohabbat ke tasawwur se bhi ghabrata hun main

be tire jo kuchh guzarti hai mire dil par na puchh

zindagi ko maut ke nazdik tar pata hun main

main tiri baton mein a kar be sar-o-saman hua

ab magar ai dil tiri baton mein kab ata hun main

muddaten guzren ke dil ne ki thi un ki arzu

aj tak dasht-e-talab mein thokaren khata hun main

zindagi mein rang-o-bu ne kis qadar dhoke diye

us pe bhi asi fareb-e-rang-o-bu khata hun main