نا آشنائے درد دل بیقرار لوگ

نا آشنائے درد دل بیقرار لوگ

کیا جانیں آبروئے غم انتظار لوگ

تسکین دل کے واسطے ہوتے نہ خار لوگ

اے کاش جانتے ترے غم کا وقار لوگ

نظریں بچا کے چلتے ہیں بیگانہ وار لوگ

اک پل میں بھول جاتے ہیں برسوں کا پیار لوگ

ان کے دلوں میں اب وہ محبت نہیں رہی

کتنا بدل گئے ہیں الٰہی یہ یار لوگ

برسوں کی رسم و راہ کا توڑیں نہ یوں بھرم

یوں بے تعلقی نہ کریں اختیار لوگ

ہر اک سخن ہے طنز کا پہلو لئے ہوئے

بدلے یہ کب کے لینے لگے مجھ سے یار لوگ

ان کی تسلیاں نہ کسی کام آ سکیں

مجھ کو بچا سکے نہ مرے غم گسار لوگ

ہم نے کیا جو جور مسلسل کا شکریہ

اپنے کئے پہ آپ ہوئے شرم سار لوگ

اک بے وفا کی یاد سے الجھا ہوا ہے دل

چھوڑیں نہ آج ذکر غم روزگار لوگ

آئے گی جب کبھی انہیں عاصیؔ ہماری یاد

روئیں گے پھوٹ پھوٹ کے دیوانہ وار لوگ

na ashna-e-dard-e-dil-e-beqarar log

kya janen abru-e-gham-e-intizar log

taskin-e-dil ke waste hote na khar log

ai kash jante tire gham ka waqar log

nazren bacha ke chalte hain begana war log

ik pal mein bhul jate hain barson ka pyar log

un ke dilon mein ab wo mohabbat nahin rahi

kitna badal gae hain ilahi ye yar log

barson ki rasm-o-rah ka toren na yun bharam

yun be taalluqi na karen ikhtiyar log

har ik sukhan hai tanz ka pahlu liye hue

badle ye kab ke lene lage mujh se yar log

un ki tasalliyan na kisi kam a saken

mujh ko bacha sake na mire gham gusar log

ham ne kiya jo jaur-e-musalsal ka shukriya

apne kiye pe ap hue sharm sar log

ik be wafa ki yad se uljha hua hai dil

chhoren na aj zikr-e-gham-e-rozgar log

aegi jab kabhi unhen asi hamari yad

roenge phut phut ke diwana war log