اٹھایا ہی نہیں جاتا جو بار زندگی ہم سے

اٹھایا ہی نہیں جاتا جو بار زندگی ہم سے

کنارہ کر چکی شاید کسی کی یاد بھی ہم سے

کبھی مانوس تھی کتنی بہار زندگی ہم سے

مگر دامن کشاں ہے آج کل ہر اک خوشی ہم سے

شب غم اس طرح بھی کٹ گئی ہے بارہا اپنی

کسی کی یاد پہروں گفتگو کرتی رہی ہم سے

کسی کے واسطے ترک تعلق مشغلہ ٹھہرا

ہمارے دل پہ جو گزری ہے وہ پوچھے کوئی ہم سے

کسی کو شاد کامی ہے کسی کو نا مرادی ہے

ملیں گے راہ الفت میں کوئی تم سے کوئی ہم سے

تری چشم کرم کی وہ توجہ ہی نہیں ورنہ

کہاں تھی اس قدر برہم ہماری زندگی ہم سے

بسا اوقات ہم نے میکدے کے در پہ دستک دی

طبیعت جب کسی صورت نہ بہلائی گئی ہم سے

کہاں تک خود فریبی میں رہیں ہم مبتلا عاصیؔ

لبوں پہ لائی جا سکتی نہیں جھوٹی ہنسی ہم سے

uthaya hi nahin jata jo bar-e-zindagi ham se

kinara kar chuki shayad kisi ki yad bhi ham se

kabhi manus thi kitni bahar-e-zindagi ham se

magar daman kashan hai aj kal har ik khushi ham se

shab-e-gham is tarah bhi kat gai hai barha apni

kisi ki yad pahron guftugu karti rahi ham se

kisi ke waste tark-e-taalluq mashghala thahra

hamare dil pe jo guzri hai wo puchhe koi ham se

kisi ko shad kami hai kisi ko na muradi hai

milenge rah-e-ulfat mein koi tum se koi ham se

tiri chashm-e-karam ki wo tawajjoh hi nahin warna

kahan thi is qadar barham hamari zindagi ham se

basa auqat ham ne maikade ke dar pe dastak di

tabiat jab kisi surat na bahlai gai ham se

kahan tak khud farebi mein rahen ham mubtala asi

labon pe lai ja sakti nahin jhuti hansi ham se