ایسے ہی دن تھے کچھ ایسی شام تھی

ایسے ہی دن تھے کچھ ایسی شام تھی

وہ مگر کچھ اور ہنستی شام تھی

بہہ رہا تھا سرخ سورج کا جہاز

مانجھیوں کے گیت گاتی شام تھی

صبح سے تھیں ٹھنڈی ٹھنڈی بارشیں

پھر بھی وہ کیسی سلگتی شام تھی

گرم الاؤ میں سلگتی سردیاں

دھیمے دھیمے ہیر گاتی شام تھی

گھیر لیتے تھے طلائی دائرے

پانیوں میں بہتی بہتی شام تھی

عرش پر ہلتے ہوئے دو ہاتھ تھے

ساحلوں کی بھیگی بھیگی شام تھی

کتنی راتوں کو ہمیں یاد آئے گی

اپنی اکلوتی سہانی شام تھی

شاخ سے ہر سرخ پتی گر گئی

پھر وہی بوجھل سی پیلی شام تھی

چاندی چاندی رات کو یاد آئے گی

سونا سونا سی رنگیلی شام تھی

سولہویں زینے پہ سورج تھا عبیدؔ

جنوری کی اک سلونی شام تھی

aise hi din the kuchh aisi sham thi

wo magar kuchh aur hansti sham thi

bah raha tha surkh suraj ka jahaz

manjhiyon ke git gati sham thi

subh se thin thandi thandi barishen

phir bhi wo kaisi sulagti sham thi

garm alao mein sulagti sardiyan

dhime dhime hir gati sham thi

gher lete the tilai daire

paniyon mein bahti bahti sham thi

arsh par hilte hue do hath the

sahilon ki bhigi bhigi sham thi

kitni raton ko hamen yad aegi

apni iklauti suhani sham thi

shakh se har surkh patti gir gai

phir wahi bojhal si pili sham thi

chandi chandi rat ko yad aegi

sona sona si rangili sham thi

solhawen zine pe suraj tha ubaid

janwari ki ik saloni sham thi