ہم پر نگاہ لطف کبھی ہے کبھی نہیں

ہم پر نگاہ لطف کبھی ہے کبھی نہیں

تم ہی کہو یہ کیا ہے مگر دل لگی نہیں

گو جی رہا ہے آج بھی کوئی ترے بغیر

لیکن یہ زندگی تو کوئی زندگی نہیں

اس کی بلا سے کوئی جئے یا کوئی مرے

جس کو کسی کے درد کا احساس ہی نہیں

دل میں نہ آرزو ہے کوئی اب نہ ولولہ

اک شام جل رہی ہے مگر روشنی نہیں

آخر ہم ان کے وعدوں پر ایمان لائیں کیا

جو ہم پہ مہربان ابھی ہیں ابھی نہیں

اس گفتگو کی طرز میں ترمیم کیجئے

کب تک میں خامشی سے سنوں آپ کی نہیں

عاصیؔ زبان خامشی میں داستان شوق

ہم نے کہی ہے بارہا اس نے سنی نہیں

ham par nigah-e-lutf kabhi hai kabhi nahin

tum hi kaho ye kya hai magar dil lagi nahin

go ji raha hai aj bhi koi tire baghair

lekin ye zindagi to koi zindagi nahin

us ki bala se koi jiye ya koi mire

jis ko kisi ke dard ka ehsas hi nahin

dil mein na arzu hai koi ab na walwala

ik sham jal rahi hai magar raushni nahin

akhir ham un ke waadon par iman laen kya

jo ham pe mehrban abhi hain abhi nahin

is guftugu ki tarz mein tarmim kijiye

kab tak main khamushi se sunun ap ki nahin

asi zaban-e-khamushi mein dastan-e-shauq

ham ne kahi hai barha us ne suni nahin