تلخیٔ ایام رہن جام کی

تلخیٔ ایام رہن جام کی

بادہ خانے میں بسر ہر شام کی

بزم میں ساقی کی چشم مست نے

شرم رکھ لی ایک تشنہ کام کی

کاش سن لیتے وہ میری داستاں

بات رہ جاتی دل ناکام کی

مٹ نہ پائی زندگی کی تلخیاں

بادہ نوشی ہم نے گو ہر شام کی

ہم کہاں تھے اس قدر بے رنگ و نام

دوستو گردش ہے صبح و شام کی

بادہ خواروں نے نہ چلنے دی کوئی

میکدے میں گردش ایام کی

اس نگاہ مختصر کا شکریہ

بات بن آئی دل ناکام کی

عاصیؔ کم ظرف نے ہنگام میں

انجمن کی انجمن بدنام کی

talkhi-e-ayyam rahan-e-jam ki

bada khane mein basar har sham ki

bazm mein saqi ki chashm-e-mast ne

sharm rakh li ek tishna kam ki

kash sun lete wo meri dastan

bat rah jati dil-e-nakam ki

mit na pai zindagi ki talkhiyan

bada noshi ham ne go har sham ki

ham kahan the is qadar be rang-o-nam

dosto gardish hai subh-o-sham ki

bada khwaron ne na chalne di koi

maikade mein gardish-e-ayyam ki

us nigah mukhtasar ka shukriya

bat ban ai dil-e-nakam ki

asi kam zarf ne hangam mein

anjuman ki anjuman badnam ki