سر پہ آئی جو آفت وہ ٹل ہی گئی

سر پہ آئی جو آفت وہ ٹل ہی گئی

زندگی رنج و غم سے نکل ہی گئی

لاکھ محتاط تھے دیدہ و دل سے ہم

پھر بھی ان کی نظر چال چل ہی گئی

عمر بھر ہم رہے غم سے دامن کشاں

زندگی آپ کے غم میں ڈھل ہی گئی

راز رکھا محبت کے ہر راز کو

پھر بھی یہ بات منہ سے نکل ہی گئی

چارہ سازوں کے الطاف کا شکریہ

زندگی غم کے غنچوں میں ڈھل ہی گئی

آپ نے لاکھ اس کو نہ چاہا مگر

انجمن میں مری بات چل ہی گئی

لاکھوں ہم نے کیا ضبط‌ دل پر مگر

ان کو دیکھا طبیعت مچل ہی گئی

جب بھی عاصیؔ مجھے وہ ملے راہ میں

دیکھ کر ہم کو یہ دنیا جل ہی گئی

sar pe ai jo afat wo tal hi gai

zindagi ranj-o-gham se nikal hi gai

lakh mohtat the dida-o-dil se ham

phir bhi un ki nazar chal chal hi gai

umr bhar ham rahe gham se daman kashan

zindagi ap ke gham mein dhal hi gai

raz rakha mohabbat ke har raz ko

phir bhi ye bat munh se nikal hi gai

chara sazon ke altaf ka shukriya

zindagi gham ke ghunchon mein dhal hi gai

ap ne lakh us ko na chaha magar

anjuman mein miri bat chal hi gai

lakhon ham ne kiya zabt-e-dil par magar

un ko dekha tabiat machal hi gai

jab bhi asi mujhe wo mile rah mein

dekh kar ham ko ye duniya jal hi gai