Arooz is now on the App Store, for iPhone and iPad. Download →

All poetry

غم میں اک لطف شادمانی ہے

Pandit Vidya Rattan Asi (1938–2019)

غم میں اک لطف شادمانی ہے

ٹھوکروں میں بھی کامرانی ہے

صرف اک عشق غیر فانی ہے

ورنہ ہر چیز آنی جانی ہے

جو نہیں آشنا محبت سے

دل پہ اس بت کی حکمرانی ہے

موت اور زندگی میں ہے یہ فرق

اک حقیقت ہے اک کہانی ہے

یاد تیری ہے زیست کا حاصل

غم ترا وجہ شادمانی ہے

چشم پر نم یہ میری خاموشی

دل کے زخموں کی ترجمانی ہے

کیا برا جو کسی کے کام آئے

جان اک دن تو خیر جانی ہے

جاں ہے اٹکی لبوں پر اے عاصیؔ

چارہ سازوں کی مہربانی ہے