پھر پریشاں حال ہے قلب و جگر کیا کیجئے

پھر پریشاں حال ہے قلب و جگر کیا کیجئے

اب علاج گردش شام و سحر کیا کیجئے

مہرباں ہو بھی اگر اب چارہ گر کیا کیجئے

کر چکا ہے درد ہی اس دل میں گھر کیا کیجئے

دیکھیے کب موت کا جھونکا بجھا ڈالے اسے

زندگی ہے اک چراغ رہ گزر کیا کیجئے

ہم سے ہوتا ہی نہیں درد محبت کا علاج

اب یہی کرتے ہیں ہم کچھ سوچ کر کیا کیجئے

راحت و آرام کا اس میں نہیں کوئی گزر

ہو رہی ہے زندگی پھر بھی بسر کیا کیجئے

جب ہمارے لب پہ آتی ہے کبھی مطلب کی بات

ہنس دیا کرتے ہیں وہ منہ پھیر کر کیا کیجئے

سوچتے ہیں حال دل ہو کس طرح ان سے بیاں

وہ بگڑ جاتے ہیں ہر اک بات پر کیا کیجئے

ہم نے جن کی چاہ میں برباد کر دی زندگی

ہم پہ ہوتی ہی نہیں ان کی نظر کیا کیجئے

ہم نے عاصیؔ ان کا ہر الزام اپنے سر لیا

اپنے دشمن تھے ہمیں کچھ اس قدر کیا کیجئے

phir pareshan hal hai qalb-o-jigar kya kijiye

ab ilaj-e-gardish-e-sham-o-sahar kya kijiye

mehrban ho bhi agar ab chara gar kya kijiye

kar chuka hai dard hi is dil mein ghar kya kijiye

dekhiye kab maut ka jhonka bujha dale use

zindagi hai ik charagh-e-rah guzar kya kijiye

ham se hota hi nahin dard-e-mohabbat ka ilaj

ab yahi karte hain ham kuchh soch kar kya kijiye

rahat-o-aram ka is mein nahin koi guzar

ho rahi hai zindagi phir bhi basar kya kijiye

jab hamare lab pe ati hai kabhi matlab ki bat

hans diya karte hain wo munh pher kar kya kijiye

sochte hain hal-e-dil ho kis tarah un se bayan

wo bigar jate hain har ik bat par kya kijiye

ham ne jin ki chah mein barbad kar di zindagi

ham pe hoti hi nahin un ki nazar kya kijiye

ham ne asi un ka har ilzam apne sar liya

apne dushman the hamen kuchh is qadar kya kijiye