ہم ہیں طوفان حوادث سے گزرنے والے

ہم ہیں طوفان حوادث سے گزرنے والے

ہم نہیں موج بلا خیز سے ڈرنے والے

آپ جی بھر کے دل زار پہ بیداد کریں

ہم کسی طور شکایت نہیں کرنے والے

کاش تو درد محبت سے شناسا ہوتا

عہد و پیمان محبت سے مکرنے والے

پھول ہی پھول نہیں اس میں کئی خار بھی ہیں

دیکھ کر راہ محبت سے گزرنے والے

تیری اس خاص ادا پر ہوں دل و جاں سے نثار

میری آنکھوں سے مرے دل میں اترنے والے

ایسی تنظیم گلستاں کا خدا ہی حافظ

اب یہ تنکے ہیں کسی روز بکھرنے والے

اب تو بیکار ہے ہر سعیٔ مسلسل عاصیؔ

اب نہیں گیسوئے حالات سنورنے والے

ham hain tufan-e-hawadis se guzarne wale

ham nahin mauj-e-bala khez se darne wale

ap ji bhar ke dil-e-zar pe bedad karen

ham kisi taur shikayat nahin karne wale

kash tu dard-e-mohabbat se shanasa hota

ahd-o-paiman-e-mohabbat se mukarne wale

phul hi phul nahin is mein kai khar bhi hain

dekh kar rah-e-mohabbat se guzarne wale

teri is khas ada par hun dil-o-jan se nisar

meri ankhon se mire dil mein utarne wale

aisi tanzim gulistan ka khuda hi hafiz

ab ye tinke hain kisi roz bikharne wale

ab to bekar hai har sai-e-musalsal asi

ab nahin gesu-e-halat sanwarne wale