بھلا چاہے گا کوئی کیا کسی کا

بھلا چاہے گا کوئی کیا کسی کا

ہو دشمن آدمی جب آدمی کا

جفا کاری ہے زندہ آپ ہی سے

جفا کاری ہے شیوہ آپ ہی کا

مرا شیوہ ہے اخلاص و محبت

برا چاہوں گا میں کیوں کر کسی کا

خدا کا شکر ہے اس بے وفا نے

سبب پوچھا ہے میری خامشی کا

ترے دل میں بھی ہو درد محبت

ترا دل کاش ہو جائے کسی کا

دلوں میں حسرت تخریب پنہاں

لبوں پہ ذکر صلح و آشتی کا

یہی معراج ہے خود آگہی کی

نہ توڑو دل زمانے میں کسی کا

وہی دشمن ہوئے ہیں آج عاصیؔ

جو دم بھرتے تھے کل تک دوستی کا

bhala chahega koi kya kisi ka

ho dushman admi jab admi ka

jafa kari hai zinda ap hi se

jafa kari hai shewa ap hi ka

mira shewa hai ikhlas-o-mohabbat

bura chahunga mein kyun kar kisi ka

khuda ka shukr hai us be wafa ne

sabab puchha hai meri khamushi ka

tire dil mein bhi ho dard-e-mohabbat

tira dil kash ho jae kisi ka

dilon mein hasrat-e-takhrib pinhan

labon pe zikr sulh-o-ashti ka

yahi meraj hai khud agahi ki

na toro dil zamane mein kisi ka

wahi dushman hue hain aj asi

jo dam bharte the kal tak dosti ka