Arooz is now on the App Store, for iPhone and iPad. Download →

All poetry

کبھی تسکیں کبھی آزار بھی ہے

Pandit Vidya Rattan Asi (1938–2019)

کبھی تسکیں کبھی آزار بھی ہے

محبت پھول بھی ہے خار بھی ہے

پگھل جاتی ہے مثل شمع لیکن

محبت آہنی دیوار بھی ہے

ترے ہونٹوں پہ ہے انکار لیکن

تری آنکھوں میں کچھ اقرار بھی ہے

بظاہر ہیں سبھی غم خوار لیکن

حقیقت میں کوئی غم خوار بھی ہے

کبھی ان کی نظر ہے وجہ تسکیں

کبھی چلتی ہوئی تلوار بھی ہے

نہ جا اس پر کہ میں چپ ہوں ستم پر

یہ خاموشی لب گفتار بھی ہے

زمانہ طنز فرما بھی ہے لیکن

الجھنا عشق سے بیکار بھی ہے

فقط گفتار پر نازاں ہے عاصیؔ

خیال خوبیٔ کردار بھی ہے