زندگانی جب ہمیں راس آئے گی

زندگانی جب ہمیں راس آئے گی

دیکھ لینا موت بھی آ جائے گی

وہ نظر جب بھی کرم فرمائے گی

لازماً دنیا ہمیں اپنائے گی

میرے گھر سے شام غم کب جائے گی

آج جائے گی تو کل پھر آئے گی

کون زندہ رہ سکے گا بن ترے

کس سے یہ تہمت اٹھائی جائے گی

کون جانے کیا ہو پھر توبہ کا حشر

میکدے پر جب گھٹا گھر آئے گی

ایک دن ہم خاک میں مل جائیں گے

ہر حقیقت داستاں بن جائے گی

کیا کروں ان کی نصیحت کا گلہ

دوستوں سے اور کیا بن آئے گی

میں نہ کہتا تھا نہ پوچھیں میرا حال

آپ کو سن کر ہنسی آ جائے گی

گردش دوراں کو سمجھا دیجئے

ہم سے الجھے گی تو منہ کی کھائے گی

وہ مٹانے کو ہیں اے عاصیؔ ہمیں

یہ خلش بھی ایک دن مٹ جائے گی

zindagani jab hamen ras aegi

dekh lena maut bhi a jaegi

wo nazar jab bhi karam farmaegi

laziman duniya hamen apnaegi

mere ghar se sham-e-gham kab jaegi

aj jaegi to kal phir aegi

kaun zinda rah sakega bin tire

kis se ye tohmat uthai jaegi

kaun jane kya ho phir tauba ka hashr

maikade par jab ghata ghar aegi

ek din ham khak mein mil jaenge

har haqiqat dastan ban jaegi

kya karun un ki nasihat ka gila

doston se aur kiya ban aegi

main na kahta tha na puchhen mera hal

ap ko sun kar hansi a jaegi

gardish-e-dauran ko samjha dijiye

ham se uljhegi to munh ki khaegi

wo mitane ko hain ai asi hamen

ye khalish bhi ek din mit jaegi