ہم اپنے دکھ کو گانے لگ گئے ہیں

ہم اپنے دکھ کو گانے لگ گئے ہیں

مگر اس میں زمانے لگ گئے ہیں

کسی کی تربیت کا ہے کرشمہ

یہ آنسو مسکرانے لگ گئے ہیں

کہانی رخ بدلنا چاہتی ہے

نئے کردار آنے لگ گئے ہیں

یہ حاصل ہے مری خاموشیوں کا

کہ پتھر آزمانے لگ گئے ہیں

یہ ممکن ہے کسی دن تم بھی آؤ

پرندے آنے جانے لگ گئے ہیں

جنہیں ہم منزلوں تک لے کے آئے

وہی رستہ بتانے لگ گئے ہیں

شرافت رنگ دکھلاتی ہے دانشؔ

کئی دشمن ٹھکانے لگ گئے ہیں

ham apne dukh ko gane lag gae hain

magar is mein zamane lag gae hain

kisi ki tarbiyat ka hai karishma

ye ansu muskurane lag gae hain

kahani rukh badalna chahti hai

nae kirdar ane lag gae hain

ye hasil hai miri khamoshiyon ka

ke patthar azmane lag gae hain

ye mumkin hai kisi din tum bhi ao

parinde ane jane lag gae hain

jinhen ham manzilon tak le ke ae

wahi rasta batane lag gae hain

sharafat rang dikhlati hai danish

kai dushman thikane lag gae hain