چلتے رہنے کے لیے دل میں گماں کوئی تو ہو

چلتے رہنے کے لیے دل میں گماں کوئی تو ہو

بے نتیجہ ہی سہی پر امتحاں کوئی تو ہو

آسمانوں کے ستم سہتی ہیں اس کے باوجود

سب زمینیں چاہتی ہیں آسماں کوئی تو ہو

مہربانوں ہی سے بچ کر آئے تھے تم دشت میں

اب یہاں بھی لگ رہا ہے مہرباں کوئی تو ہو

قہقہوں کو یاد رکھتی ہی نہیں دنیا کبھی

اس لیے دکھ کی بھی پیارے داستاں کوئی تو ہو

کر رہا ہوں میں درختوں سے مسلسل گفتگو

اس گھنے جنگل میں دانشؔ ہم زباں کوئی تو ہو

chalte rahne ke liye dil mein guman koi to ho

be natija hi sahi par imtihan koi to ho

asmanon ke sitam sahti hain is ke bawajud

sab zaminen chahti hain asman koi to ho

mehrbanon hi se bach kar ae the tum dasht mein

ab yahan bhi lag raha hai mehrban koi to ho

qahqahon ko yad rakhti hi nahin duniya kabhi

is liye dukh ki bhi pyare dastan koi to ho

kar raha hun main darakhton se musalsal guftugu

is ghane jangal mein danish ham zaban koi to ho