Arooz is now on the App Store, for iPhone and iPad. Download →

All poetry

ضدوں کو اپنی تراشو اور ان کو خواب کرو

Madan Mohan Danish (b. 1961)

ضدوں کو اپنی تراشو اور ان کو خواب کرو

پھر اس کے بعد ہی منزل کا انتخاب کرو

محبتوں میں نئے قرض چڑھتے رہتے ہیں

مگر یہ کس نے کہا ہے کبھی حساب کرو

تمہیں یہ دنیا کبھی پھول تو نہیں دے گی

ملے ہیں کانٹے تو کانٹوں کو ہی گلاب کرو

سیاہ راتو چمکتی نہیں ہے یوں تقدیر

اٹھاؤ اپنے چراغوں کو ماہتاب کرو

کئی صدائیں ٹھکانہ تلاش کرتی ہوئی

فضا میں گونج رہی ہیں انہیں کتاب کرو

کسی کے رنگ میں ڈھلنا ہی ہے اگر دانشؔ

تو اپنے آپ کو تھوڑا بہت خراب کرو