ہے انتظار مقدر تو انتظار کرو

ہے انتظار مقدر تو انتظار کرو

پر اپنے دل کی فضا کو بھی خوش گوار کرو

تمہارے پیچھے لگی ہیں اداسیاں کب سے

کسی پڑاؤ پہ رک کر انہیں شکار کرو

ہمارے خوابوں کا در کھٹکھٹاتی رہتی ہیں

تم اپنی یادوں کو سمجھاؤ ہوشیار کرو

بھلی لگے گی یہی زندگی اگر اس میں

خیال و خواب کی دنیا کو بھی شمار کرو

بھروسہ بعد میں کر لینا ساری دنیا پر

تم اپنے آپ پہ تو پہلے اعتبار کرو

hai intizar muqaddar to intizar karo

par apne dil ki faza ko bhi khush gawar karo

tumhare pichhe lagi hain udasiyan kab se

kisi parao pe ruk kar unhen shikar karo

hamare khwabon ka dar khatkhatati rahti hain

tum apni yadon ko samjhao hoshyar karo

bhali lagegi yahi zindagi agar is mein

khayal-o-khwab ki duniya ko bhi shumar karo

bharosa baad mein kar lena sari duniya par

tum apne ap pe to pahle etibar karo