اب یہی صورت دیدار بنا لیتے ہیں

اب یہی صورت دیدار بنا لیتے ہیں

ان سے ملنے کا حسیں خواب سجا لیتے ہیں

ہم وہی لوگ تھے ہر بات پہ رونے والے

ہم جو اشکوں کو بھی اب راز بنا لیتے ہیں

ہم ہیں بے رحمیٔ حالات سے واقف پھر بھی

آنکھ میں روز نئے خواب سجا لیتے ہیں

شہر جاناں کے سبھی لوگ ہیں دشمن میرے

دیکھ لینے کو بھی افسانہ بنا لیتے ہیں

کاسۂ چشم کو خیرات میں آنسو دے کر

دل سے یہ بوجھ اداسی کا ہٹا لیتے ہیں

زندگی دیکھتے رہتے ہیں تجھے حیرت سے

اور دیوار سے بس سر کو ٹکا لیتے ہیں

ab yahi surat-e-didar bana lete hain

un se milne ka hasin khwab saja lete hain

ham wahi log the har bat pe rone wale

ham jo ashkon ko bhi ab raz bana lete hain

ham hain be rahmi-e-halat se waqif phir bhi

ankh mein roz nae khwab saja lete hain

shahr janan ke sabhi log hain dushman mere

dekh lene ko bhi afsana bana lete hain

kasa-e-chashm ko khairat mein ansu de kar

dil se ye bojh udasi ka hata lete hain

zindagi dekhte rahte hain tujhe hairat se

aur diwar se bas sar ko tika lete hain