نہ گل کھلے ہیں نہ گردش میں جام آیا ہے

نہ گل کھلے ہیں نہ گردش میں جام آیا ہے

یہ کیسا اب کے چمن میں نظام آیا ہے

عمل سے ظرف سے ایثار سے محبت سے

ہمارا دل ہی زمانے کے کام آیا ہے

عطا ہوا ہے جنہیں عزم سرفروشی کا

انہیں کو دار و رسن کا سلام آیا ہے

لباس شرم و حیا نذر مصلحت کر کے

یہ کون دیکھنا بالائے بام آیا ہے

ہم اپنے درد کو بھی درد کہہ نہیں سکتے

کوئی بتائے یہ کیسا مقام آیا ہے

طلسم ٹوٹ گیا ہے سحرؔ جدائی کا

نگاہ مست کا جب بھی پیام آیا ہے

na gul khule hain na gardish mein jam aya hai

ye kaisa ab ke chaman mein nizam aya hai

amal se zarf se isar se mohabbat se

hamara dil hi zamane ke kam aya hai

ata hua hai jinhen azm-e-sarfaroshi ka

unhen ko dar-o-rasan ka salam aya hai

libas-e-sharm-o-haya nazr-e-maslahat kar ke

ye kaun dekhna bala-e-bam aya hai

ham apne dard ko bhi dard kah nahin sakte

koi batae ye kaisa maqam aya hai

tilism tut gaya hai sahar judai ka

nigah-e-mast ka jab bhi payam aya hai