حکومت ذہن و دل پہ جب سے قائم ہے اندھیروں کی

حکومت ذہن و دل پہ جب سے قائم ہے اندھیروں کی

اڑانیں بھول بیٹھی ہیں نئی نسلیں پرندوں کی

نہ تلخی ہی کبھی ہوگی نہ پھر تکرار لفظوں کی

اگر بنیاد مستحکم رکھی جائے گی رشتوں کی

مسافر کو فقط احساس خوش فہمی دلاتی ہیں

سڑک پر بھاگتی پرچھائیاں اکثر درختوں کی

یہ بازار سیاست ہے یہاں ہر ایک منڈی میں

تجارت عام ہوتی جا رہی ہے کھوٹے سکوں کی

تمہیں سے پوچھنا ہے آج ہم کو حضرت واعظ

اڑاؤ گے کہاں تک دھجیاں آخر اصولوں کی

تری چوکھٹ پہ لے کر آئے ہیں اشکوں کا نذرانہ

خدایا لاج رکھ لے اب تو ان مغموم بندوں کی

سحرؔ میں کس طرح مانوں مہذب ہو گئی دنیا

اچھالی جا رہی ہے آج بھی پگڑی غریبوں کی

hukumat zehn-o-dil pe jab se qaim hai andheron ki

uranen bhul baithi hain nai naslen parindon ki

na talkhi hi kabhi hogi na phir takrar lafzon ki

agar buniyad mustahkam rakhi jaegi rishton ki

musafir ko faqat ehsas-e-khush fahmi dilati hain

sarak par bhagti parchhaiyan aksar darakhton ki

ye bazar-e-siyasat hai yahan har ek mandi mein

tijarat am hoti ja rahi hai khote sukun ki

tumhen se puchhna hai aj ham ko hazrat-e-waiz

uraoge kahan tak dhajjiyan akhir usulon ki

tiri chaukhat pe le kar ae hain ashkon ka nazrana

khudaya laj rakh le ab to un maghmum bandon ki

sahar mein kis tarah manun mohazzab ho gai duniya

uchhali ja rahi hai aj bhi pagri gharibon ki