مضطرب اور ہوا ذوق نظر آخر شب

مضطرب اور ہوا ذوق نظر آخر شب

بند امید کے سب ہو گئے در آخر شب

اے اسیران قفس میرے علاوہ تم کو

کوئی دے گا نہ بہاروں کی خبر آخر شب

ہم سے ہوتا بھی علاج دل بیتاب تو کیا

اور بڑھتا ہی گیا درد جگر آخر شب

جو غریبوں کے ہیں ہمدرد انہیں یاد نہیں

کتنے لوگوں کے جلائے گئے گھر آخر شب

زندگی قابل تعظیم بنی دنیا میں

ان کے جلوؤں سے جو ٹکرائی نظر آخر شب

فہم و ادراک کے اجزائے پریشاں کی قسم

رنگ لایا مرے نالوں کا اثر آخر شب

اس طرح بہہ چلے آنکھوں سے مسلسل آنسو

ہو سحرؔ جیسے ستاروں کا سفر آخر شب

muztarib aur hua zauq-e-nazar akhir-e-shab

band ummid ke sab ho gae dar akhir-e-shab

ai asiran-e-qafas mere alawa tum ko

koi dega na baharon ki khabar akhir-e-shab

ham se hota bhi ilaj-e-dil-e-betab to kya

aur barhta hi gaya dard-e-jigar akhir-e-shab

jo gharibon ke hain hamdard unhen yad nahin

kitne logon ke jalae gae ghar akhir-e-shab

zindagi qabil-e-taazim bani duniya mein

un ke jalwon se jo takrai nazar akhir-e-shab

fahm-o-idrak ke ajza-e-pareshan ki qasam

rang laya mire nalon ka asar akhir-e-shab

is tarah bah chale ankhon se musalsal ansu

ho sahar jaise sitaron ka safar akhir-e-shab