ازل سے بس یہی عالم ہے کیا کیا جائے

ازل سے بس یہی عالم ہے کیا کیا جائے

کبھی خوشی ہے کبھی غم ہے کیا کیا جائے

ادب سے جھک کے یہ کہتا ہے آسماں گویا

زمیں کے سامنے سر خم ہے کیا کیا جائے

حیات و موت کی وادی کا فاصلہ یارو

ہر ایک سانس پہ کچھ کم ہے کیا کیا جائے

قریب آ کے وہ معصومیت سے کہتے ہیں

مریض عشق لب دم ہے کیا کیا جائے

نشاط و عیش کے لمحے تمہیں مبارک ہوں

مجھے عزیز شب غم ہے کیا کیا جائے

میں اپنے ڈھنگ سے جینے کا کیوں ہوا عادی

زمانہ اس لئے برہم ہے کیا کیا جائے

تخیلات کی ان سرد وادیوں میں سحرؔ

ردائے فکر و نظر کم ہے کیا کیا جائے