زمین و آسماں کی ساری پرتیں چیخ اٹھتی ہیں

زمین و آسماں کی ساری پرتیں چیخ اٹھتی ہیں

وہ واحد لم یزل ہے سب دلیلیں چیخ اٹھتی ہیں

کہانی میں مری پنہاں عجب سا کرب ہے غم ہے

قلم خاموش ہو جائے تو سطریں چیخ اٹھتی ہیں

گزاروں کس طرح لمحے اب اس شہر خموشاں میں

زبوں حالی پہ اب میری فصیلیں چیخ اٹھتی ہیں

ردیف و قافیہ کی ان دنوں اوقات ہی کیا ہے

غلط ہاتھوں میں پڑ جائیں تو بحریں چیخ اٹھتی ہیں

تلاطم ہے عجب سا میرے اندر آج کل ماہرؔ

بھنور خاموش ہوتا ہے تو لہریں چیخ اٹھتی ہیں

zamin-o-asman ki sari paraten chikh uthti hain

wo wahid lam yazal hai sab dalilen chikh uthti hain

kahani mein miri pinhan ajab sa karb hai gham hai

qalam khamosh ho jae to satren chikh uthti hain

guzarun kis tarah lamhe ab is shahr-e-khamoshan mein

zabun hali pe ab meri fasilen chikh uthti hain

radif-o-qafiya ki in dinon auqat hi kya hai

ghalat hathon mein par jaen to bahren chikh uthti hain

talatum hai ajab sa mere andar aj kal mahir

bhanwar khamosh hota hai to lahren chikh uthti hain