کثرت تماشا کو وحدت آشنا پایا

کثرت تماشا کو وحدت آشنا پایا

ہستیٔ فنا میں بھی جلوۂ بقا پایا

کیا ہوا خضر نے جو چشمۂ بقا پایا

جینے پر مرے تو کیا جینے کا مزا پایا

جذبۂ نظارہ ہے آنکھ کی خطا کیا ہے

کعبہ میں صنم دیکھا دیر میں خدا پایا

خوں ہوا تمنا کا ظلم سربسر دیکھا

دل کو امتحاں میں بھی صبر آزما پایا

ہو گیا ہے کثرت میں راز آشکار اس کا

شان ہر جگہ دیکھی جلوہ جا بجا پایا

درد سے ہوئیں پیدا دل میں سو تمنائیں

زندگئ لذت کو درد آشنا پایا

پردہ در خموشی ہے بے حجاب آنکھیں ہیں

راز بزم دشمن کا ہم نے کچھ پتا پایا

حسن کی کشش ہی میں رہبری کی قوت تھی

گمرہان الفت نے راہ کا پتا پایا

راز ہو گیا افشا اٹھ گیا حجاب آخر

آنکھ سے چھپے تو کیا دل میں ظاہرا پایا

یاد آ گیا دل کو پھر الست کا پیماں

پھر جبیں کو کعبہ سے سجدہ آشنا پایا

عشق کیا کیا ہم نے سختیاں سدا جھیلیں

دل کو ہر مصیبت میں جرأت آزما پایا

معجزہ ادب کا ہے شادؔ ہر کلام اپنا

نکتہ رس طبیعت نے نطق کیا رسا پایا

kasrat-e-tamasha ko wahdat ashna paya

hasti-e-fana mein bhi jalwa-e-baqa paya

kya hua khizar ne jo chashma-e-baqa paya

jine par mire to kya jine ka maza paya

jazba-e-nazara hai ankh ki khata kya hai

kaaba mein sanam dekha der mein khuda paya

khun hua tamanna ka zulm sarbasar dekha

dil ko imtihan mein bhi sabr azma paya

ho gaya hai kasrat mein raz ashkar us ka

shan har jagah dekhi jalwa ja baja paya

dard se huin paida dil mein so tamannaen

zindagi-e-lazzat ko dard-e-ashna paya

parda dar khamoshi hai be hijab ankhen hain

raz bazm-e-dushman ka ham ne kuchh pata paya

husn ki kashish hi mein rahbari ki quwwat thi

gamrahan ulfat ne rah ka pata paya

raz ho gaya ifsha uth gaya hijab akhir

ankh se chhupe to kya dil mein zahiran paya

yad a gaya dil ko phir alast ka paiman

phir jabin ko kaaba se sajda ashna paya

ishq kya kiya ham ne sakhtiyan sada jhelen

dil ko har musibat mein jurat azma paya

mojiza adab ka hai shad har kalam apna

nukta ras tabiat ne nutq kya rasa paya