اب میرے لئے آنکھ تیری نم ہے مجھے کیا

اب میرے لئے آنکھ تیری نم ہے مجھے کیا

اب ترک مراسم کا تجھے غم ہے مجھے کیا

اس شہر نگاراں میں سر شام ابھی تک

پھولوں سے مہکتا ہوا موسم ہے مجھے کیا

روشن تھا جو برسوں سے دیا میری وفا کا

اب تیرے شبستاں میں وہ مدھم ہے مجھے کیا

پھر تیرے لبوں پر ہے وہی رنگ حنا کا

شانے پہ ترے زلف بھی برہم ہے مجھے کیا

یہ فصل بہاراں یہ جنوں خیزیٔ موسم

اب دل میں ترا غم بھی بہت کم ہے مجھے کیا

اک دشت تحیر کا سماں ہے مرے آگے

منزل کا نشاں آج بھی مبہم ہے مجھے کیا

میں ڈھلتی ہوئی دھوپ میں سائے کی طرح ہوں

تو نکہت گل حسن مجسم ہے مجھے کیا

ab mere liye ankh teri nam hai mujhe kya

ab tark-e-marasim ka tujhe gham hai mujhe kya

is shahr-e-nigaran mein sar-e-sham abhi tak

phulon se mahakta hua mausam hai mujhe kya

raushan tha jo barson se diya meri wafa ka

ab tere shabistan mein wo maddham hai mujhe kya

phir tere labon par hai wahi rang-e-hina ka

shane pe tire zulf bhi barham hai mujhe kya

ye fasl-e-baharan ye junun khezi-e-mausam

ab dil mein tira gham bhi bahut kam hai mujhe kya

ik dasht-e-tahayyur ka saman hai mire age

manzil ka nishan aj bhi mubham hai mujhe kya

main dhalti hui dhup mein sae ki tarah hun

tu nikhat-e-gul husn mujassam hai mujhe kya