ہوا کی زد پہ دیے کو سنبھال رکھا ہے

ہوا کی زد پہ دیے کو سنبھال رکھا ہے

فصیل شب پہ اجالا بحال رکھا ہے

ازل سے ہیں خط محور پہ یہ زمان و مکاں

زمیں پہ سلسلۂ ماہ و سال رکھا ہے

صفات و ذات کو اضداد پر کیا تقسیم

خوشی کے ساتھ غم لا زوال رکھا ہے

خوشی عطا کی دلوں کو بقدر پیمانہ

فروغ غم میں بھی اک اعتدال رکھا ہے

رموز کھول دئے مجھ پہ آسمانوں کے

مگر شعور میں دام خیال رکھا ہے

اسی نے خاک سے پیدا کیا ہے انساں کو

مگر ہر اک کا جدا خد و خال رکھا ہے

ہر ایک نقش کو اس نے بڑی مہارت سے

بہت عظیم مگر بے مثال رکھا ہے

کمال یہ ہے کہ تخلیق کائنات ہوئی

مگر کمال میں پنہاں سوال رکھا ہے

یہی ہے شان کریمی یہی ہے حسن کمال

ہر ایک شے کا عروج و زوال رکھا ہے

صباؔ ہزار عطا کی ہیں نعمتیں اس نے

مگر جہاں میں اسیر ملال رکھا ہے

hawa ki zad pe diye ko sambhal rakha hai

fasil-e-shab pe ujala bahal rakha hai

azal se hain khat-e-mehwar pe ye zaman-o-makan

zamin pe silsila-e-mah-o-sal rakha hai

sifat-o-zat ko azdad par kiya taqsim

khushi ke sath gham-e-la zawal rakha hai

khushi ata ki dilon ko baqadr-e-paimana

farogh-e-gham mein bhi ik etidal rakha hai

rumuz khol diye mujh pe asmanon ke

magar shuur mein dam-e-khayal rakha hai

usi ne khak se paida kiya hai insan ko

magar har ik ka juda khad-o-khal rakha hai

har ek naqsh ko us ne bari maharat se

bahut azim magar be misal rakha hai

kamal ye hai ke takhliq-e-kainat hui

magar kamal mein pinhan sawal rakha hai

yahi hai shan-e-karimi yahi hai husn-e-kamal

har ek shai ka uruj-o-zawal rakha hai

saba hazar ata ki hain nematen us ne

magar jahan mein asir-e-malal rakha hai