نشاط مے ہے کہ جام شراب ہے کیا ہے

نشاط مے ہے کہ جام شراب ہے کیا ہے

وہ خواب حسن ہے یا حسن خواب ہے کیا ہے

نگار حسن غزالاں بہار راحت جاں

سحر کا نور ہے وہ ماہتاب ہے کیا ہے

ہوا چلی وہی خوشبو بدن کی یاد آئی

یہ خواب ہے کہ حقیقت سراب ہے کیا ہے

شب وصال جو گزری کہ تیرے چہرے پر

صبا کا لمس ہے رنگ حجاب ہے کیا ہے

یہ شام غم بھی نہیں یاد رفتگاں بھی نہیں

عجیب سی ہے خلش اضطراب ہے کیا ہے

چمن میں نکہت گل ہے نہ اب نسیم بہار

دھواں سا پھیلا ہوا ہے سحاب ہے کیا ہے

چراغ اب بھی تری رہ گزر میں جلتا ہے

مری وفا کا صلہ ہے حساب ہے کیا ہے

وہ شمس ہے کہ ستارا وہ چاند ہے کہ سحر

وہ شخص جان صباؔ ہے سراب ہے کیا ہے

nishat-e-mai hai ke jam-e-sharab hai kya hai

wo khwab-e-husn hai ya husn khwab hai kya hai

nigar-e-husn ghazalan bahar rahat-e-jan

sahar ka nur hai wo mahtab hai kya hai

hawa chali wahi khushbu badan ki yad ai

ye khwab hai ke haqiqat sarab hai kya hai

shab-e-wisal jo guzri ke tere chehre par

saba ka lams hai rang-e-hijab hai kya hai

ye sham-e-gham bhi nahin yad-e-raftagan bhi nahin

ajib si hai khalish iztirab hai kya hai

chaman mein nikhat-e-gul hai na ab nasim-e-bahar

dhuan sa phaila hua hai sahab hai kya hai

charagh ab bhi tiri rah guzar mein jalta hai

miri wafa ka sila hai hisab hai kya hai

wo shams hai ke sitara wo chand hai ke sahar

wo shakhs jan saba hai sarab hai kya hai