آئینہ اک خیال کا ہوں شیشہ گر نہیں

آئینہ اک خیال کا ہوں شیشہ گر نہیں

میں وہ مکاں ہوں جس کا کوئی بام و در نہیں

کس سمت جا رہا ہوں یہ مجھ کو خبر نہیں

میں جس کی ہوں تلاش میں یہ وہ سحر نہیں

آیا ہوں اجنبی کی طرح شہر درد میں

جو رہ گزر ملی وہ تری رہ گزر نہیں

اپنی صلیب جاں پہ کھڑا ہوں برہنہ سر

اک جام ہوں سفال کا میں کوزہ گر نہیں

اک دشت بے گماں میں ہے منزل کی جستجو

اک کرب لا زوال ہے جس سے مفر نہیں

تنہائیوں کے زہر سے بے کل ہے زندگی

میرا رفیق شب بھی مرا ہم سفر نہیں

ہر شاخ پر صلیب کا ہوتا ہے اب گماں

بے برگ ہر شجر ہے کہ جس میں ثمر نہیں

اکثر یہ سوچتا ہوں سفر کا نشاں ملے

شاید رہ حیات ابھی مختصر نہیں

پانی کی بوند کو بھی ترستی ہے یہ زمیں

ابر بہار کا بھی یہاں سے گزر نہیں

طائر کی طرح میں ہوں صباؔ اب شکستہ پر

پرواز کی ہوس ہے مگر بال و پر نہیں

aina ik khayal ka hun shisha gar nahin

main wo makan hun jis ka koi bam-o-dar nahin

kis samt ja raha hun ye mujh ko khabar nahin

main jis ki hun talash mein ye wo sahar nahin

aya hun ajnabi ki tarah shahr dard mein

jo rah guzar mili wo tiri rah guzar nahin

apni salib-e-jan pe khara hun barahna sar

ik jam hun sifal ka main kuza gar nahin

ik dasht-e-be guman mein hai manzil ki justuju

ik karb-e-la zawal hai jis se mafar nahin

tanhaiyon ke zahr se be kal hai zindagi

mera rafiq-e-shab bhi mira ham safar nahin

har shakh par salib ka hota hai ab guman

be barg har shajar hai ke jis mein samar nahin

aksar ye sochta hun safar ka nishan mile

shayad rah-e-hayat abhi mukhtasar nahin

pani ki bund ko bhi tarasti hai ye zamin

abr-e-bahar ka bhi yahan se guzar nahin

tair ki tarah main hun saba ab shikasta par

parwaz ki hawas hai magar bal-o-par nahin