ہزار غم ہوں تو پھر انتخاب کیسے کروں

ہزار غم ہوں تو پھر انتخاب کیسے کروں

دریدہ دل کو میں نذر عذاب کیسے کروں

میں اس کو بھول چکا تھا کئی برس کے بعد

ملی ہے وصل کی ساعت حساب کیسے کروں

وہی ہے عشق کی منزل وہی وفا کا سفر

کھلی جو آنکھ ذرا ذکر خواب کیسے کروں

غم حیات کی اب کوئی انتہا ہی نہیں

میں اپنی ذات کو وقف سراب کیسے کروں

یہ شہر درد ہے اے دوستان دل زدگاں

وفا شمار کروں احتساب کیسے کروں

وہی ہے عظمت و جاہ و حشم وہی منصب

فقیہ شہر وہی ہے خطاب کیسے کروں

صباؔ وہ شخص ابھی تک ہے مجھ سے بیگانہ

میں اس کی ذات سے پھر انتساب کیسے کروں

hazar gham hun to phir intikhab kaise karun

darida dil ko main nazr-e-azab kaise karun

main us ko bhul chuka tha kai baras ke baad

mili hai wasl ki saat hisab kaise karun

wahi hai ishq ki manzil wahi wafa ka safar

khuli jo ankh zara zikr-e-khwab kaise karun

gham-e-hayat ki ab koi intiha hi nahin

main apni zat ko waqf-e-sarab kaise karun

ye shahr-e-dard hai ai dostan-e-dil zadagan

wafa shumar karun ehtisab kaise karun

wahi hai azmat-o-jah-o-hasham wahi mansab

faqih-e-shahr wahi hai khitab kaise karun

saba wo shakhs abhi tak hai mujh se begana

main us ki zat se phir intisab kaise karun