کف غبار میں ملبوس میرا پیکر تھا

کف غبار میں ملبوس میرا پیکر تھا

یہ سانحہ تو ازل سے مرا مقدر تھا

ہر ایک سمت سے مجھ پر ہوئی تھی بارش سنگ

زہے نصیب میں اپنے مکاں کے اندر تھا

سکوت شب میں یہ آواز مجھ کو دی کس نے

وہ راستے کا مسافر تھا یا کہ رہبر تھا

اسی کا عکس رہا آئنے میں جلوہ فگن

وہ اپنی ذات کا شاید خود آئینہ گر تھا

ترے جمال سے تھی زندگی میں رعنائی

مرے وجود کا تو ہی ازل سے محور تھا

اندھیری رات میں سایہ بھی ساتھ دے نہ سکا

نشیب راہ میں خود ہی میں اپنا رہبر تھا

مری نظر میں بریشم تھا سلک پیراہن

گہر بھی میرے لئے راستے کا پتھر تھا

مرے سفر کی صباؔ انتہا یہی تو نہیں

قدم تھا ریت پہ اور سامنے سمندر تھا

kaf-e-ghubar mein malbus mera paikar tha

ye saneha to azal se mira muqaddar tha

har ek samt se mujh par hui thi barish-e-sang

zahe nasib main apne makan ke andar tha

sukut-e-shab mein ye awaz mujh ko di kis ne

wo raste ka musafir tha ya ke rahbar tha

usi ka aks raha aine mein jalwa fagan

wo apni zat ka shayad khud aina gar tha

tire jamal se thi zindagi mein raanai

mire wajud ka tu hi azal se mehwar tha

andheri rat mein saya bhi sath de na saka

nasheb rah mein khud hi mein apna rahbar tha

miri nazar mein baryasham tha silk-e-pairahan

guhar bhi mere liye raste ka patthar tha

mire safar ki saba intiha yahi to nahin

qadam tha ret pe aur samne samundar tha