دنیا سجی ہوئی ہے جو بازار کی طرح

دنیا سجی ہوئی ہے جو بازار کی طرح

میں بھی چلوں گا آج خریدار کی طرح

ٹوٹے ہوں یا پرانے ہوں اپنے تو ہیں یہی

خوابوں کو جمع کرتا ہوں آثار کی طرح

یہ اور بات ہے کہ نمایاں رہوں مگر

دنیا مجھے چھپائے ہے آزار کی طرح

میری کتاب زیست تم اک بار تو پڑھو

پھر چاہے پھینک دو کسی اخبار کی طرح

اب زندگی کی دھوپ بھی سیدھا کرے گی کیا

اب تک میں کج رہا تری دستار کی طرح

مدت ہوئی کہ گھومتا پھرتا ہوں رات دن

افکار کے دیار میں نادار کی طرح

اس خوف سے کہ سایہ بھی اپنا نہ چھوٹ جائے

رک رک کے چل رہا ہوں میں بیمار کی طرح

duniya saji hui hai jo bazar ki tarah

main bhi chalunga aj kharidar ki tarah

tute hun ya purane hun apne to hain yahi

khwabon ko jama karta hun asar ki tarah

ye aur bat hai ke numayan rahun magar

duniya mujhe chhupae hai azar ki tarah

meri kitab-e-zist tum ik bar to parho

phir chahe phenk do kisi akhbar ki tarah

ab zindagi ki dhup bhi sidha karegi kya

ab tak main kaj raha tiri dastar ki tarah

muddat hui ke ghumta phirta hun rat din

afkar ke dayar mein nadar ki tarah

is khauf se ke saya bhi apna na chhut jae

ruk ruk ke chal raha hun main bimar ki tarah