بساط رنگ و بو آتش فشاں معلوم ہوتی ہے

بساط رنگ و بو آتش فشاں معلوم ہوتی ہے

رگ گل میں نہاں برق تپاں معلوم ہوتی ہے

تمنا ہی سے قائم ہے وقار‌ نوجوانی بھی

تمنا گرچہ جنس رائیگاں معلوم ہوتی ہے

کنارہ ہے کوئی اس کا نہ اس کا کوئی ساحل ہے

محبت ایک بحر بیکراں معلوم ہوتی ہے

گذشتہ وارداتوں پر میں جب بھی غور کرتا ہوں

مجھے ہر واردات اک داستاں معلوم ہوتی ہے

وفا کوشی کا جذبہ سرد پڑ جاتا ہے پیری میں

وفا پروردۂ فکر جواں معلوم ہوتی ہے

اثر باقی ابھی تک ہے نگاہوں میں جوانی کا

مجھے ہر ایک شے اب بھی جواں معلوم ہوتی ہے

جفا و جور کے قصے ہیں اب بھی معتبر فارغؔ

وفا کی بات زیب داستاں معلوم ہوتی ہے

bisat-e-rang-o-bu atish fishan maalum hoti hai

rag-e-gul mein nihan barq-e-tapan maalum hoti hai

tamanna hi se qaim hai waqar-e-naujawani bhi

tamanna garche jins-e-raigan maalum hoti hai

kinara hai koi us ka na us ka koi sahil hai

mohabbat ek bahr-e-bekaran maalum hoti hai

guzishta wardaton par main jab bhi ghaur karta hun

mujhe har wardat ik dastan maalum hoti hai

wafa koshi ka jazba sard par jata hai piri mein

wafa parwarda-e-fikr-e-jawan maalum hoti hai

asar baqi abhi tak hai nigahon mein jawani ka

mujhe har ek shai ab bhi jawan maalum hoti hai

jafa-o-jaur ke qisse hain ab bhi motabar farigh

wafa ki bat zeb-e-dastan maalum hoti hai