مری جدائی میں آنسو بہائے جاتے ہیں

مری جدائی میں آنسو بہائے جاتے ہیں

یہ فتنہ میری لحد پر جگائے جاتے ہیں

ضیائے حسن کو درگاہ دل ترستی ہے

چراغ دیر و حرم میں جلائے جاتے ہیں

نہیں ستاتے کسی کو بھی جو زمانے میں

وہی زمانے میں اکثر ستائے جاتے ہیں

ضیائے حسن سے ہوتا ہے جن کا دل معمور

چراغ گور پر ان کی جلائے جاتے ہیں

فسانوں سے نہیں بنتیں حقیقتیں لیکن

حقیقتوں سے فسانے بنائے جاتے ہیں

کہیں غرور تکبر کہیں فتور خودی

ہماری راہ میں رہزن بٹھائے جاتے ہیں

ادب کی محفل رنگیں میں رات دن فارغؔ

مرے فسانے ہی اکثر سنائے جاتے ہیں

miri judai mein ansu bahae jate hain

ye fitna meri lahad par jagae jate hain

ziya-e-husn ko dargah-e-dil tarasti hai

charagh-e-dair-o-haram mein jalae jate hain

nahin satate kisi ko bhi jo zamane mein

wahi zamane mein aksar satae jate hain

ziya-e-husn se hota hai jin ka dil maamur

charagh-e-gor par un ki jalae jate hain

fasanon se nahin bantin haqiqaten lekin

haqiqaton se fasane banae jate hain

kahin ghurur-e-takabbur kahin futur-e-khudi

hamari rah mein rahzan bithae jate hain

adab ki mahfil-e-rangin mein rat din farigh

mire fasane hi aksar sunae jate hain