جہاں والوں سے برتی اس قدر بے گانگی میں نے

جہاں والوں سے برتی اس قدر بے گانگی میں نے

کہ برہم کر لیا اپنا نظام زندگی میں نے

سکھائے حسن کافر کو سلیقے خود نمائی کے

سنوارا پے بہ پے اپنا مذاق عاشقی میں نے

ہوئے روشن نہ پھر بھی بام و در فکر و تصور کے

ہزاروں بار کی بزم جہاں میں روشنی میں نے

دل ناعاقبت اندیش کی کوتاہ‌‌ بینی کی

کبھی تائید کی میں نے کبھی تردید کی میں نے

ہزاروں بار تہذیب و تمدن کی فضا بدلی

ہزاروں بار اک دنیا نئی آباد کی میں نے

کیا افشا نہ راز غم کسی پر جیتے جی فارغؔ

بڑے صبر و تحمل سے بسر کی زندگی میں نے

jahan walon se barti is qadar be gangi main ne

ke barham kar liya apna nizam-e-zindagi main ne

sikhae husn-e-kafir ko saliqe khud numai ke

sanwara pe ba pe apna mazaq-e-ashiqi main ne

hue raushan na phir bhi bam-o-dar fikr-o-tasawwur ke

hazaron bar ki bazm-e-jahan mein raushni main ne

dil-e-naaqibat andesh ki kotah bini ki

kabhi taid ki main ne kabhi tardid ki main ne

hazaron bar tahzib-o-tamaddun ki faza badli

hazaron bar ik duniya nai abad ki main ne

kiya ifsha na raz-e-gham kisi par jite ji farigh

bare sabr-o-tahammul se basar ki zindagi main ne