نقاب بزم تصور اٹھائی جاتی ہے

نقاب بزم تصور اٹھائی جاتی ہے

شکست خوردوں کی ہمت بڑھائی جاتی ہے

بھٹکنے لگتا ہے راہ وفا سے جب عالم

حدیث عشق ہماری سنائی جاتی ہے

متاع ہوش و خرد بے بہا سہی لیکن

در حبیب پہ یہ بھی لٹائی جاتی ہے

نظر سے ہوتی ہے لطف و کرم کی بارش بھی

نظر سے برق تپاں بھی گرائی جاتی ہے

وفور شوق کی دیکھو تو مصلحت کوشی

جنوں کی بات خرد سے چھپائی جاتی ہے

کس اعتماد سے آغاز‌ دور الفت میں

خیال و خواب کی دنیا بسائی جاتی ہے

فضائے روح پہ تاریکیاں مسلط ہیں

حرم میں شمع عقیدت جلائی جاتی ہے

دکھا دکھا کے مآل جنوں کی فتنہ گری

بشر کو رسم مروت سکھائی جاتی ہے

متاع عشق و محبت نگاہ عالم سے

کس احتیاط سے فارغؔ چھپائی جاتی ہے

naqab-e-bazm-e-tasawwur uthai jati hai

shikast khurdon ki himmat barhai jati hai

bhatakne lagta hai rah-e-wafa se jab alam

hadis-e-ishq hamari sunai jati hai

mata-e-hosh-o-khirad be baha sahi lekin

dar-e-habib pe ye bhi lutai jati hai

nazar se hoti hai lutf-o-karam ki barish bhi

nazar se barq-e-tapan bhi girai jati hai

wafur-e-shauq ki dekho to maslahat koshi

junun ki bat khirad se chhupai jati hai

kis etimad se aghaz-e-daur-e-ulfat mein

khayal-o-khwab ki duniya basai jati hai

faza-e-ruh pe tarikiyan musallat hain

haram mein shama aqidat jalai jati hai

dikha dikha ke maal-e-junun ki fitna giri

bashar ko rasm-e-murawwat sikhai jati hai

mata-e-ishq-o-mohabbat nigah-e-alam se

kis ehtiyat se farigh chhupai jati hai