اس کے کھلتے ہی ہر اک سمت اجالا ہوگا

اس کے کھلتے ہی ہر اک سمت اجالا ہوگا

یہ تبسم ہے اسے درد نے پالا ہوگا

جس نے بچپن سے ہی دولت کا چلن دیکھا ہو

اس کا انداز زمانہ سے نرالا ہوگا

ہم کو موجوں سے الجھنے کا ہنر آتا ہے

ہم کو منجدھار نے خوش ہو کے اچھالا ہوگا

جس کی راتیں ہوں کٹیں برف کے صحراؤں میں

اس کے تلووں میں تو خوابوں میں بھی چھالا ہوگا

جس کی ہر بات تجھے تیر سی چبھ جاتی ہے

وہ بہرحال ترا چاہنے والا ہوگا

تو تو انسان ہے صندل کا کوئی پیڑ نہیں

تو نے کس طور سے سانپوں کو سنبھالا ہوگا

جن کو آتا ہے ادب میں بھی سیاست کرنا

ان کے کاندھوں پہ ہی ریشم کا دشالہ ہوگا