سکھوں کی آس ہے کب سے مگر نہیں آتے

سکھوں کی آس ہے کب سے مگر نہیں آتے

میں وہ درخت ہوں جس پر ثمر نہیں آتے

نہ جانے کون سی کشتی نگل گیا دریا

کہ اس کے بعد سے اس میں بھنور نہیں آتے

یہ کیسے برف کے حجرے میں بس گیا ہوں میں

کسی کی دھوپ کے ٹکڑے ادھر نہیں آتے

ترے خیال کی کیسی ہے رہ گزر جس میں

پہاڑ آتے ہیں لیکن شجر نہیں آتے

کہاں ہیں کون سی دنیا میں گم ہیں وہ بچے

کہ جن کو یاد کبھی اپنے گھر نہیں آتے

یہ کیسے دیر و حرم ہیں کہ جن کی چھت پر اب

محبتوں کے پرندے نظر نہیں آتے

تجھی کو کاٹ کے بے شکل کر گئے ساحلؔ

وگرنہ درد کے دھارے کدھر نہیں آتے

sukhon ki as hai kab se magar nahin ate

main wo darakht hun jis par samar nahin ate

na jane kaun si kashti nigal gaya dariya

ke is ke baad se is mein bhanwar nahin ate

ye kaise barf ke hujre mein bas gaya hun main

kisi ki dhup ke tukre idhar nahin ate

tire khayal ki kaisi hai rah guzar jis mein

pahar ate hain lekin shajar nahin ate

kahan hain kaun si duniya mein gum hain wo bachche

ke jin ko yad kabhi apne ghar nahin ate

ye kaise dair-o-haram hain ke jin ki chhat par ab

mohabbaton ke parinde nazar nahin ate

tujhi ko kat ke be shakl kar gae sahil

wagarna dard ke dhare kidhar nahin ate