کیا بتاؤں تمہیں کہ کیا ہوں میں

کیا بتاؤں تمہیں کہ کیا ہوں میں

بھر چکے زخم کی دوا ہوں میں

جس کی خواہش ہی گمرہی ٹھہری

خواہشوں کا وہ قافلہ ہوں میں

کیوں مجھے گھیر کر کے بیٹھے ہو

اے غمو آدمی برا ہوں میں

یہ جو بدنام خط ہیں ان کا ہی

لوگ کہتے ہیں حاشیہ ہوں میں

آخری حرف ہوں تبسم کا

اور اشکوں کی ابتدا ہوں میں

یہ مری زندگی بتائے گی

کتنی قسطوں میں کب مرا ہوں میں

آج کی شام گھر نہ لوٹوں گا

صبح اکثر یہ سوچتا ہوں میں

ساری دنیا کو ہے خیال مرا

کس تغافل کا سلسلہ ہوں میں

جس کی خود کی ہی کوئی ٹھور نہیں

ایک ایسا ہی آسرا ہوں میں

وہ جو چیخوں میں ہو گئی تبدیل

گونگی بہری وہی سدا ہوں میں

اس کا لہجہ اکھر رہا ہے کیوں

کیا اسے چاہنے لگا ہوں میں

جب سے اماں نے رخصتی لی ہے

چاند کو پہروں دیکھتا ہوں میں

کیوں ہے اجڑا ہوا مرا ساحلؔ

کس سمندر کی بد دعا ہوں میں

kya bataun tumhen ke kya hun main

bhar chuke zakhm ki dawa hun main

jis ki khwahish hi gumrahi-e-thahri

khwahishon ka wo qafila hun main

kyun mujhe gher kar ke baithe ho

ai ghamo admi bura hun main

ye jo badnam khat hain un ka hi

log kahte hain hashiya hun main

akhiri harf hun tabassum ka

aur ashkon ki ibtida hun main

ye miri zindagi bataegi

kitni qiston mein kab mira hun main

aj ki sham ghar na lautunga

subh aksar ye sochta hun main

sari duniya ko hai khayal mira

kis taghaful ka silsila hun main

jis ki khud ki hi koi thaur nahin

ek aisa hi asra hun main

wo jo chikhon mein ho gai tabdil

gungi bahri wahi sada hun main

us ka lahja akkhar raha hai kyun

kya use chahne laga hun main

jab se aman ne rukhsati li hai

chand ko pahron dekhta hun main

kyun hai ujra hua mira sahil

kis samundar ki bad dua hun main