نبود و بود کے منظر بناتا رہتا ہوں

نبود و بود کے منظر بناتا رہتا ہوں

میں زرد آگ میں خود کو جلاتا رہتا ہوں

ترے جمال کا صدقہ یہ آتش روشن

چراغ آب رواں پر بہاتا رہتا ہوں

دعائیں اس کے لیے ہیں صدائیں اس کے لیے

میں جس کی راہ میں بادل بچھاتا رہتا ہوں

اداس دھن ہے کوئی ان غزال آنکھوں میں

دیے کے ساتھ جسے گنگناتا رہتا ہوں

عجیب سست روی سے یہ دن گزرتے ہیں

میں آسمان پہ شامیں بناتا رہتا ہوں

میں اڑتا رہتا ہوں نیلے سمندروں میں کہیں

سو تتلیوں کے لیے خواب لاتا رہتا ہوں

یہ مجھ میں پھیل رہا ہے جو اضطراب شدید

تو پھر یہ طے ہے اسے یاد آتا رہتا ہوں

nabod-o-bud ke manzar banata rahta hun

main zard ag mein khud ko jalata rahta hun

tire jamal ka sadqa ye atish-e-raushan

charagh-e-ab-e-rawan par bahata rahta hun

duaen us ke liye hain sadaen us ke liye

main jis ki rah mein badal bichhata rahta hun

udas dhun hai koi un ghazal ankhon mein

diye ke sath jise gungunata rahta hun

ajib sust rawi se ye din guzarte hain

main asman pe shamen banata rahta hun

main urta rahta hun nile samundaron mein kahin

so titliyon ke liye khwab lata rahta hun

ye mujh mein phail raha hai jo iztirab-e-shadid

to phir ye tai hai use yad ata rahta hun