ہر ایک گام پہ رنج سفر اٹھاتے ہوئے

ہر ایک گام پہ رنج سفر اٹھاتے ہوئے

میں آ پڑا ہوں یہاں تجھ سے دور جاتے ہوئے

عجیب آگ تھی جس نے مجھے فروغ دیا

اک انتظار میں رکھے دیے جلاتے ہوئے

طویل رات سے ہوتا ہے برسر پیکار

سو چاک تیز ہوا ہے مجھے بناتے ہوئے

یہ تیز گامئ صحرا الگ مزاج کی ہے

جو مجھ سے بھاگ رہی ہے قریب آتے ہوئے

ہے ایک شور گزشتہ مرے تعاقب میں

میں سن رہا ہوں جسے اپنے پار آتے ہوئے

شریک آتش و آب و ہوا و خاک رہے

مرے عناصر ترتیب شکل پاتے ہوئے

بہت قریب سے گزری ہے وہ نوائے سفید

مرے حواس کا نیلا دھواں اڑاتے ہوئے

میں امتزاج قدیم و جدید ہوں کامیؔ

سو اسم عصر ہی پڑھنا مجھے بلاتے ہوئے

har ek gam pe ranj-e-safar uthate hue

main a para hun yahan tujh se dur jate hue

ajib ag thi jis ne mujhe farogh diya

ik intizar mein rakhe diye jalate hue

tawil rat se hota hai barsar-e-paikar

so chak tez hua hai mujhe banate hue

ye tez gami-e-sahra alag mizaj ki hai

jo mujh se bhag rahi hai qarib ate hue

hai ek shor-e-guzishta mire taaqub mein

main sun raha hun jise apne par ate hue

sharik-e-atish-o-ab-o-hawa-o-khak rahe

mire anasir tartib shakl pate hue

bahut qarib se guzri hai wo nawa-e-safed

mire hawas ka nila dhuan urate hue

main imtizaj-e-qadim-o-jadid hun kami

so ism-e-asr hi parhna mujhe bulate hue