Arooz is now on the App Store, for iPhone and iPad. Download →

All poetry

ترک جام و سبو نہ کر پائے

Laiq Aajiz

ترک جام و سبو نہ کر پائے

اس لیے ہم وضو نہ کر پائے

وقت آخر بھی حضرت ناصح

اپنا منہ قبلہ رو نہ کر پائے

اس کی رحمت کے سائبان میں تھا

میرا شک بھی عدو نہ کر پائے

مصلحت کی کھڑی تھی جو دیوار

دور اس کو کبھو نہ کر پائے

عمر بھر دوسروں کی فکر رہی

اپنا دامن رفو نہ کر پائے

ہائے مجبوریاں کہ اس کے حضور

پیش اپنا لہو نہ کر پائے

کر لی کمرے میں خودکشی عاجزؔ

اس سے جب گفتگو نہ کر پائے