دشمنوں کو دوست بھائی کو ستم گر کہہ دیا

دشمنوں کو دوست بھائی کو ستم گر کہہ دیا

لوگ کیوں برہم ہیں کیا شیشے کو پتھر کہہ دیا

اس لیے مجھ کو امیر شہر نے دی ہے سزا

میں نے خود کو خادم سبط پیمبر کہہ دیا

چڑھتے سورج کی پرستش میں سبھی مصروف تھے

مجھ سے جب پوچھا گیا اللہ اکبر کہہ دیا

کتنے سادہ لوح ہیں یہ سب سفیران جنوں

راہزن بھی مل گیا تو اس کو رہبر کہہ دیا

ہو گیا دشمن بھی میرے حوصلے کا معترف

مجھ کو دریائے حوادث کا شناور کہہ دیا

شعر کہنے میں مجھے عاجزؔ مزہ آنے لگا

اس نے جب بے ساختہ مجھ کو سخن ور کہہ دیا

dushmanon ko dost bhai ko sitam gar kah diya

log kyun barham hain kya shishe ko patthar kah diya

is liye mujh ko amir-e-shahr ne di hai saza

main ne khud ko khadim-e-sibt-e-payambar kah diya

charhte suraj ki parastish mein sabhi masruf the

mujh se jab puchha gaya allah akbar kah diya

kitne sada lauh hain ye sab safiran-e-junun

rahzan bhi mil gaya to us ko rahbar kah diya

ho gaya dushman bhi mere hausle ka motarif

mujh ko dariya-e-hawadis ka shanaor kah diya

sher kahne mein mujhe ajiz maza ane laga

us ne jab be sakhta mujh ko sukhan war kah diya